កំពង់ស្ពឺ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានផ្ដាំដោយមិនចេញឈ្មោះប៉ុន្តែហាក់បីដូចជាទំនងសំដៅទៅលើលោក សម រង្ស៊ី ថាប្រសិនជាចង់ដកមនុស្សរបស់សម្ដេច គឺត្រូវដកមនុស្សទាំងអស់ដែលនៅជុំវិញខ្លួនរបស់ សម រង្ស៊ី។
ថ្លែងនៅក្នុងជំនួបជាមួយនឹងកម្មករជិត ២ម៉ឺននាក់នៅក្នុងខេត្តកំពង់ស្ពឺ ព្រឹកថ្ងៃទី១៧ ខែមិថុនា ឆ្នាំ២០២៣ សម្ដេចតេជោបានលើកឡើងថា សម្ដេចបានទទួលនូវរបាយការណ៍និងព័ត៌មានទាំងអស់ពីផែនការរបស់ សម រង្ស៊ី ព្រមទាំងផែនការនៃការចង់ធ្វើបុណ្យផ្កាដើម្បីប្រមូលលុយពីរអ្នកគាំទ្ររបស់ខ្លួនផងដែរ។
អ្វីដែលកាន់តែច្បាស់ថែមទៀតនោះគឺទិន្នន័យនៃការប្រមូលលុយរបស់ សម រង្ស៊ី ក៏ត្រូវបានសម្ដេចតេជោដឹងផងដែរ។
សម្ដេចតេជោបានលើកឡើងថា មនុស្សរបស់សម្ដេចគឺមាននៅជុំវិញខ្លួនរបស់លោក សម រង្ស៊ី រួមទាំងអ្នកនៅរួមតុបាយជាមួយនឹងលោក សម រង្ស៊ី ផងដែរ៕
